Waftiga wasiirka amniga gudaha ee xukuumadda federaalka soomaaliya cabdulaahi sheikh ismaaciil fartaag ayaa maanta kulamo la qaatay odoyaasha dhaqanka,dhalinyarada iyo ururada haweenka degmadda garbohaareey ee Gobolka Gedo.
Kulanka ayaa diirada lagu saaray sidii bulshada rayidka ah ay uga qayb qaadan lahayd hirgelinta iyo taageerida doorashada qof iyo codka ah oo dowladda soomaaliya ay dalka ka qabanayso.
Intii kulanka uu socday odoyaasha dhaqanka iyo qaybaha kale ee bulshada ayaa soo bandhigay talooyin iyo aragtiyo ku saabsan doorkooda ku aadan xaqiijinta doorasho cadaalad ah oo lagu wada qanacsanyahay,bulshada ayaana cadaysay muhiimada ay leedahay wacyigelinta dadwaynaha iyo iskaashiga si loo helo nidaam dimuqraadi ah oo si hufan u shaqeynaya.
Wasiir fartaag oo kulanka ka hadlay ayaa ku dhiirageliyay bulshada in ay door firfircoon ka qaataan geedi socodka dimuqraadiyada isagoo xusay in doorashada qof iyo codka ah ay tahay dariiq muhiim ah oo lagu gaarayo cadaalad iyo horumar siyaasadeed oo waara.
Ugu dambayn wasiir fartaag ayaa sidoo kale sheegay in dowladda ay ku dedaalayso in ay abuurto jawi ku habboon doorashooyinka si loo xaqiijiyo in codka shacabka uu si buuxda uga dhex muuqdo hogaanka dalka.