Faahfaahino dheeraad ah ayaa waxaa laga helayaa qasaaraha ka dhashay weerar rogaal celi ah oo ay saaka kooxda alshabaab ku qaadeen deegaano dhowaan uun lagala wareegay oo kuyaalo duleedka magaalo xeebeedka kismaayo ee xarunta gobolka jubbada hoose.
Weerarka oo ka dhacay agagaarka deegaanka buulo xaaji ayaa waxaa xigay dagaal toos ah oo dhexmaray ciidamada jubbaland oo garab ka helaya kuwa danab iyo alshabaabkii weerarka soo qaaday,kaas oo qaatay saacado badan.
Ilo dadka deegaanka ahaa warkanews.com u sheegay in dagaalka uu xoogganaa isla markaana ay maqlayeen daryanka hubka culus ee ay iswaydaarsanayeen labadda dhinac,waxaama jira qasaare dhimasho iyo dhaawacba leh.
Ugu yaraan 7 askari oo katirsanaa ciidanka jubbaland ayaa weerarka lagu dilay,halka lagu dhaawacay tiro kale kuwaas oo la gaarsiiyay isbitaalka guud ee magaalada kismaayo,sida ay inoo xaqiijiyeen ilo wareedyo xil kas ah.
Saraakiisha ciidanka daraawiishta jubbaland oo ka hadlay dagaalkaan waxay sheegeen inay iska difaaceen alshabaabkii weerarka soo qaaday ayna gaarsiiyeen qasaare culus.
Xaaladda ayaa haatan ah mid aad u kacsan waxaana weli ciidamada ay kusii siqayaan deegaano horleh oo kuyaala gobolkaas si ay uga fara maroojiyaan maleeshiyaadka alshabaab.